أنا اللّي مازال مبهّتني في الحكاية متاع سي الموخر، أنّو حديثه الكل خارج الموضوع وبعيد على الخزمة تماما. علاش تحكّ في بلاصة ما كلاتكش؟ آش مجبدك في تونيزيا وأندونيسيا وفوق السطح وتحت الراقوبة؟ يا خي الطلاين ما يعرفوش تونس فين تقع ماشي تورّي فيهم في قصّة عربي توصّللها ولاّ كيفاش؟ وأنت وزير في الدولة ولاّ تابع ديوان قيس اﻷراضي؟؟؟
ها التّضومير الماسط متاع بعض وزراء، عاملين ارواحهم قافزين ودمهم خفيف وأولاد رحبة وبطحاء وهاكا اللّغة، لا يليق بناس تحترم مقامها في الدولة وتحافظ على هيبتها ... ماشي يحكيلهم في حكاية أمي سيسي وهاك العام نقرا في أمريكا، ياخي في بالو مازالت فال القراية في أمريكا؟
الحديث هذاكه فشلم بيه على ام صنطوعة، تو تقلك "جيستومون"، موش على الطلاين ماشي تبيع في عرض خوك الدزيري والليبي ، اللي هوما لحمك ودمك ونهار اللي تطيح بينا ما نلقاوهم كان هم، هذا الكل باش الطلاين يفرحوا بيه ويقولوا شوف ها الصيد بوقلادة، هاو طلع مقدم على طول جهده موش موخّر…
ثمة ظاهرة بدات تنتشر في ها البلاد:الخرف السياسي... والعزوزة تعرفوها كي تخرف... تولّي تحكي على ليلة عرسها الحكومة هذي تفكرني بإلياس بن صالح، مدافع السي اس اس في الزمن الجميل، أخطر مهاجم ضدّ مرماه في تاريخ تونس، عامتها سجل خمسة بونتو ضدّ مرماه وماازال في مرحلة الذهاب، إلى درجة أنّو المدرب متاعو عملّه شكون يحاصره في الدّيزويت...
توة المشكلة موش في الّلي تفضحوا وخرّجوا كفاءتهم داخل هذه الحكومة. هذوكة على الأقلّ هانا عرفناهم وانجموا نعملولهم ماركاج أنديفيديال، كل ما يجوا يتكلّموا... المشكلة في الخلايا اللّي مازالت نايمة في ها الحكومة الموخّرة... ولّينا كل يوم نقوموا حاطّين يدينا على قلوبنا شنوة المصيبة اللّي باش يعملوهالنا اليوم أنا واحد من الناس بطلت ماعادش نسمع حظك اليوم، ولّيت مركّز مع برنامج مصيبة اليوم ولّينا خايفين عليهم أكثر من الذّرّ الصّغار لا يعملوا مصيبة في أرواحهم ولاّ يشربوا الجافال ولاّ يطيّحوا بعضهم في الدروج…
يا أخي ما عادش تخلّوهم وحّدهم... اعملولهم Garderie ولاّ شوفوا كيفاش تبعّدوا عليهم الحوايج الخطيرة الكل، اللاّمات والدوايات وخاصة التصريحات... شنوّة ها الوحلة الكلبة هذي؟؟ ... ولّيناش كلّ ما نجوا خارجين بقضية نربطوهم على الكراسي قدام التلفزة ولاّ نحطّوهم في الرّوضة باش يعسّوا عليهم...
يا خويا ماعادش مساعدني أنا هكّه... كلّ حزب يشدّ الغشاشر متاعو... الحكومة هذي إذا لم يحجر عليها باش تعمللنا حرب جرثومية في ها البلاد... وهاي لحيتي…