اليوم طاح بينا زنس إمام ما يعرفش ربّي! مرمدنا تمرميد وغسلنا وعصرنا وشيّحنا ونشرنا وسخسخنا تسخسيخ واحنا مطبّسين روسنا ومبركسين قاطعين النّفس. طبعا الرّاجل استغلّ الفرصة، ما داما من لغا فلا جمعة له... خذا فرصته فينا بالكامل وصال وجال وعرعر وبعبع وجعجع وهو يصيح ويشاور بيديه ويتهزّ وتنفض، لين قريب يشمّر علينا جبّته ولاّ ينحّيها خلاص، ويهبطلنا بالشّلاكة على مؤخّراتنا وبالصّرافيق على قفانا...
هذا الكلّ وموضوع الخطبة هو الاعتدال، مالا كان جاء موضوعها على علامات القيامة ولاّ عذاب القبر! آش كان باش يعمل فينا... الإمام هذا، وغيرو ملّي قادني حظّي العاثر إليهم فوقعت تحت سياطهم، خلاّني نحسّ أنّو فمّه برشه أيمّة يلزم يعدّو اختبار عند بسيكياتر، يثبت سلامتهم النّفسيّة والعقليّة من عقد النّرجسيّة المفرطة والسّاديّة وصحّة الرّقعة.
يا أخي تعدّات ساعة وربع وهو يصيح لين عروقو قريب تطّرشق، حتّى في الدّعاء يصيح على ربّي يا عباد ربّي ! ما خلاّش منّا شكون ما دكّهوش في جهنّم ! اللّي قال أفّ في جهنّم، واللّي فطر وما قالش بسم الله في جهنّم واللّي مشى يبحّر وطاحت عينه على الشّحمة في جهنّم، واللّي ضيّع الفجر في جهنّم واللّي ما يدعيش دعاء الدّخول والخروج من الخلاء في جهنّم، تمنّيت نقوم نلفلفه من جبّته ونكربسه لوطى ونفشّخه ونرميه تحت ساقين باقي الكفّار اللّي حاضرين يصلّوا في الجمعة الكلّ، واحنا بطبيعتنا ماشين لجهنّم دعوة متلازمة!!!!
كلّ هذا واحنا نحكو على الاعتدال !!!! أيوااااه ! تمشوش تنساو موضوع الخطبة!! ما نحكوش على الأفكار الغالطة، وقوالب الجهل المربّع اللّي يكدّس فيها، والخزعبلات وحكايات أمّي سيسي والحكم بودورو... وغياب تامّ عن الواقع اللّي عايشينه... من كثر الحديث على قريش والكفّار والجاهليّة، زادت لهبت فينا سخانة العبد فوق سخانة ربّي... ولا تسل عن باقي "الكفّار" اللّي حاضرين!!
كلّ واحد متلفّت لجهة ولاّ مدنكس ويلعن في الشّيطان باش يتعدّى ها النّهار على خير علاه هكّه؟؟؟؟ ياخي ناقصين احنا تنفير لخلق ربّي في صلاتهم ودينهم وعباداتهم، باش نزيدو نطيّحوا بيهم واحد مضبّع يفقعلهم المرّارة وينفخهلهم القولون؟؟؟ علاه ياربّي هكّه؟؟؟ !!!!
كي خارجين نسمع في زوز يضحكوا وواحد يقول للاخر: صدّقني الشّهيلي هذا الكلّ وحتّى عذاب جهنّم أهون عليّ من ها السّاعة اللّي عدّيتها على ذمّته!!!!
اااه .. نسيت باش نكمّللكم نهاية الخطبة والاستنتاج اللّي خرج بيه، وهو أنّه لا يجب الإفراط والتّطرّف في الحرام، مثلما لا يجب التّطرّف والإفراط في الحلال!!!! ( والله العظيم ماني نكذب عليه). معناها هانكم ما تكثّروش ياسر ياسر في الحرام باش تكونوا معتدلين، شوي حرام يزّي، ياخي لازم بالويبة هو؟؟؟ ماو خوذ شوي وفكّر في خوك المسلم هو زاده خلّيله معاك شوي حرام باش هو زاده باش يفوّح بيه، وما تكونش حياته متطرّفة بكلّها حلال صافي!!!!
الحاصيلو... جمعة مشات زيزي، واللّي تمركالي فيها ذنوب أكثر ملّي وصّانا عليهم سيدنا الإمام الكلّ. وبرّا عاد توّة اهبطوا عليّ أنتم زاده بالتّوبيخ والتّسخسيخ، ماني ناقصكم أنا !! ونستاهل، على خاطر جيت نحكيلكم ونحكّ في بلاصة ما كلاتنيش!!!!