ويُطلِق أهل افريقيّة على المذهب الرعواني، عبارة "دزّْ تَخْطِف"، وقال بعضهم "اللِّيقة تجِيبْ"... والله أعلم…
بُومَاضَة:
في كواليس احدى القنوات التلفزية التونسية (حاشا من يصّنّت)، نايب في البرلمان، على كتلة أقوى حزب في تاريخ البلاد (بالرسمي مانيش نفدلك، تنجموا تسألوا المؤرخين)... نايب يبكي ويتشلحط قدّام سي الطاهر معدنوس (رِمز –بكسر الميم- من رموز الثورة المضادّة) ويقولو:
* يا سي الطاهر راهي المنظومة القديمة رجعتتتتتت... راهي رجعت بقوّوووووة ما عادش قادرين علييييييها
يردّ عليه سي الطاهر معدنوس بكلّ عنجهيّة وكبرياء وفرعنة وغطرسة متاع منظومة قديمة ورجعت بقوّة (والآخر شاد جُرّتو ويريقل في الكرافات بعصبيّة مفرطة):
* آش نعمللكم؟؟ انتوما ما تحبّوش تقاوموها... رغم الّي قادرين عليهم.... تحطوا 500 بوليس، و200 قاضي و100 راجل أعمال في الحبس (800 فرّادي، مع شويّا دزّان... حتى من القرجاني يهزّهم)... توّا توفى المشكلة…
ينتهي المشهد التراجيكوميدي بتشلحيطة أخيرة من نائب كتلة أقوى حزب في تاريخ البلاد، وقد "غلَّبْتْ" عليه "الكرافات" أيّما تغليب:
* رَجْعتتتتت بقووووووة المنظومة…..
مَفْتُول:
الناس الكلّ "مشوكيا" من التسريب الأخير متاع نبيل القروي وهو يتعقربْ ويخطط في تخطيط جهنمي ضدّ جمعيّة أنا يقض… الناس مصدومة… ومن جملتها حتى من بعض الأحزاب خرّجت بينات شجب ومطالبة بالتتبع القضائي للراجل… مصدومين وهوما كانوا كل ما يستدعاهم لبلاتو تلفزي على قناة "العايلة" يجيووه "سبق" ساقيهم أعلى من راسهم… غير يطلعوا في الشاشة بركة… مصدومين ونساو فيسع إلي التكمبين والضرب تحت الحزام وتشويه الناس والتآمر عليهم ماهوش من اختصاص ولد القروي… نساو كيفاش تدار الأمور داخل أحزابهم بالذات… مثلا حزب المؤتمر مع احترامي لنضالاته تقسم على 72 فرقة ولا فيهم وحدة ناجية… وخلّي من بقيّة الأحزاب "الثوريّة" مفرّكة دوريجين….
حُقْنة:
الواحد كيف يمشي يقضي شويا لحم ولا شويا خضرة ولاّ شويا غلّة… ويتلدغْ… يغشوه… يبيعولو سلعة مضروبة… ماهو يقوّم القيامة ويرجع للجزار، ولاّ الخضار ولاّ العطار… ويشريهالو… (اذا هي مرا تصبغو بالدعاء وتعملو شوهة والصياح قبب… ماهم زعام عادة)… فبحيث، ثمة نوع من الشعور بالقهرة كيف واحد يزلبحوه حتى في حاجة مالها معنى…
فما بالك في غشّان وتزلبيح بلاد كاملة يا بوقلب… معناها مصير أجيال! كيفاش؟
الناس مشات وانتخبتْ قائمات على أساس برامج سياسيّة، واجتماعات، وزيارات للجهات، وزنقة زنقة دار دار… وعلامات ولافتات ومناشير وأبواق وكراهب لوكسيون والناس بايتة تلصّق… وشوكوطوم وروز بالفاكية وقازوز… وساعات ادور خنيفري… وعباد مقطعة رواحها… ودفاع مستميت على مرشحيهم… وفي الأخير…. يلقاو الاصبع الوسطى (لسان العرب لابن منظور). برلمان منتخب ويتزوحل… قوانين معطلة… تكتيك وحسابات… وتوافقات تحت الطاولة…. وقرارات خطيرة، ومعاهدات أخطر… وقروض راهنة البلاد للعنكوش… والناس ما على بالهاش… وكيف تتغشّ في كيلو غلّة، اطيح ما في عينها بلّة…