ولا الي تقررو مصالح وزارة الداخلية ضد الحريات الشخصية...كيف ما يظهرلها وبدون شفافية ولا حسيب ولا رقيب وبدون احترام حقوق الدفاع ..وبدون مراقبة قضائية... وبدون وجود حق تظلم جدي للدفاع عن الحق الدستوري لكل مواطن في التنقل امام القضاء...صحيح؟ وهل أصبحت عندكم قرارات مصالح الداخلية قرآن مقدس؟
في خدمتي طيلة سنوات... شفت مظالم كثيرة من هاذي s17...تفريق عايلات...وقطع أرزاق ...وتحطيم مستقبل شباب...وأطفال تولدو وما شافوش بوهم وما حضنهمش...ونساء ورجال معرسة وما عاشتش حياتها...وازواج مقطعة بين البلدان...واحد في سجن كبير تونس سنوات وسنوات...ولاخر في الخارج.. رغم إلى عندهم فيزا بش يتمتعو بالحق في الحياة العائلية الي هو حق من حقوق الإنسان ...الخ…
خاطر طالما انو ما ثماش شروط قانونية واضحة ومعلنة وشفافية...ومراقبة قضائية الي وحدها تحمي الحريات الشخصية للمواطنين المحترمين للقانون كيما ضمنو الدستور...وهو فوقنا لكلنا...سلطات مختلفة ومواطنين...يبقى الاستبداد هو سيد القرار... ال s 17 في مفهومها الامني عنا... موروثة من بن علي... وقتها بن علي كان اصلا ما يعطيش البسبوراتات...كان يطبقها بطريقة استئصالية كيف سياستو... وأنا شخصيا من بين ضحاياها... بقيت s17 عشرة سنين ممنوع من السفر…
حتى نهار طلعتلي في مخي الكلبة بنت الكلب وما عادش نعقل...وقمت باعتصام في المحكمة الابتدائية بتونس بمكتب عميد المحامين الأستاذ عبد الجليل بوراوي الي وقف معانا بشرف مع الكثير من الزملاء الديمقراطيين...قمت بيه مع الأستاذ العياشي الهمامي والكاتب العام سابقا لهيئة المحامين الأستاذ جمال الدين بيدة وشدينا صحيح وعملنا فضيحة لبن علي في تونس وفي الخارج...ما عجبتش برشة محامين تجمعيين شهرو بينا كيما توا قاعد نقرا للى يشهروا... وخذينا بسبوراتنا رغم انفهم...ورجع لينا حقنا في السفر...وسافرنا...وديما رغم أنفهم…
ولي يمارسوا في نفس الممارسات اليوم...راهم هوما نفسهم جماعة بن علي أو تلامذتهم في نفس الوزارة... وبنفس الطرق والعقلية الاستبدادية البنعلية…
يلزم تعرفوا أنو في البلدان الديمقراطية...الإجراء هذا يتخذ لمراقبة الارهابيبن والمجرمين للوقاية من جرائمهم...قبل اقترافها في تونس...بينت التجربة منذ سنوات وقبل الثورة...ان الإجراء الأمني هذا اتخذ في الكثير من الأحيان بصفة اعتباطية لحرمان مواطنين من حقوقهم الأساسية المضمونة بالدستور بدون تمكينهم من حقوق دفاع....وليس فقط للوقاية من الإرهاب..
إلى ما يدري يقول سبول…
كانكم بش تواصلوا هكا تدافعوا على ممارسات استبدادية بدون التفريق بين الغث والسمين...ماو اختصروا المسافات...وطالبو بإيقاف العمل بالدستور... وزيد انتم صرفتو صرفتو...زيدو قولو للمجرم محمد بن سلمان يرجعلكم بن علي...ويعاود يجثم على رقابنا..
ملخر؟ يعطيها الصحة يمينة...اذا كانها عملت فضيحة للدفاع عن حق مواطن في التنقل...وهي تعرفو ومقتنعة انو موش ارهابي..."راجل" وعليها الكلام...مسألة إنسانية وحقوقية...والسياسة على برة في الأمور هاذي…
شخصيا عملت فضايح ضد الاستبداد اكثر من هكا...لفائدة الي نتفق معاهم في السياسية ولي نختلف معاهم...اسمها مواطنة…
وكل من يساند ممارسات الاستبداد...او يشهر بلي يواجهها... ما يفرقش عليه…