الجماعة هاذم تقولش عليهم موش عايشين في تونس... ياخي قامو الجماعة هاذم مرة في حياتهم على الفجر وشافو جحافل العاملات والعمال ماشية للعمل في كيران مكدسين فيها على بعضهم كيما في قفص الدجاج؟
ياخي شافو عاملات الفلاحة مكدسين على بعضهم في حاويات الكتكاتات على الطرقات كيف علالش العيد...وشافوهم في الصقيع والشهيلى وظهورهم مقوسة....يعملو بش يوكلوهم ؟
ياخي شافو الموظفين...الي هوما الدولة وهيبة الدولة...خاطر بلاش بيهم ما ثماش دولة..(وموش السياسيين الحاكمين إلي يعطيو في الأوامر وعايشين في القطن ويتبهبرو على الشعب الكريم ويكدسو في الأملاك من حلالك وحرامك)...ياخي شافو ها الموظفين كيفاش أصبحو الاسم العالي والمربط الخالي...لكلهم متداينين... ولوكان موش الفريب راهم زادة عريانين؟
ياخي شافو الشباب أصحاب الشهايد مفرتين في القهاوي...مرسكيين على قهوة وسيقارو...يستناو بدون جدوى في رحمة المسؤولين الفاسدين بش يسيبولهم قروض يكونو بيهم مشاريع في اختصاصاتهم يخدمو فيها ويخدمو البطالة...ويساهمو في تطوير اقتصاد البلاد وتعصيره....وفي دفع الضرائب لميزانية الدولة والأموال للصناديق الإجتماعية...والتصدير؟
ياخي شافو الفلاح الي يفلح من الصبح للمغرب ...وغارق في الديون...وما يلحقش على تسديد المصاريف...وبعد يشوف منتوج عرق جبينو يشريه الوكال بأضعاف أضعاف السوم الي باعو بيه....كلاووه القشارة الي ما يخدموش...كيف القراد الي يمص في دم الحيوان وهو راكش في بقعتو؟ ومحميين خاطرهم يمولو في احزاب السلطة وحملاتها الانتخابية؟
يعرفو شمعناه وقت هاذم ياخذو الشهرية يفرقوها على العطار والخضار والستاق والصوناد والملاك...وتبقى جيوبهم منقوبة؟ ياخي يعرفو الي الناس هاذم ما عادش يقدرو على عجة ومقرونتهم ديما كذابة؟
ياخي يعرفو وقت الناس هاذم تمرض ما يلقاوش فلوس الطبيب والخدمات الطبية والدواء...وانو الدولة قاعدة تخصص في الصحة بالقزحة بالقزحة...وأصبحت عنا صحة للمفقرين المذكورين يموت بسببها الذين يعملون....وصحة للأغنياء من الطراز الرفيع تزيد في أمل الحياة للي منهم برشة يتزايدو بالعمل ثم العمل ثم العمل؟
ياخي فاهمين ان مشكلتنا الأصلية تكمن في ضرورة تغيير منوال تنمية أثبت انو اكبر جريمة في حق هذا الشعب... وصل البلاد لفوهة بركان اجتماعي...وموش في بعض الظواهر السلبية الي نشوفوها لكلنا في الإدارات وأماكن العمل المختلفة...ولي حتى لوكان نتجاوزوها موش بهذا بش ننهض بالإقتصاد ونقضي على البطالة والمديونية ونطورو فلاحتنا؟
ولا فاهمين ويحبو يمشيوها علينا ويضللو الشعب الكريم....وماشي في بالهم بش ينجمو يحملو ضحايا الاستغلال والفساد وضع البلاد...وقت هوما الي قايمين بيها...ولوكان موش العمل متاعهم راهي صحراء قاحلة...هوما الي موقفين البلاد بعرق جبينهم... موش هاظوكم المسؤولين بأفعالهم الشنيعة من فساد واستغلال فاحش على أزمة البلاد ووضع شعبها الي أصبح لا يطاق؟
وياخي موش شايفين الاحتجاجات الاجتماعية المتفاقمة من مواطنين مهمشين من جراء أفعالهم... وياخي موش يسمعو في مطلبهم الأساسي إلي هو... العمل ثم العمل ثم العمل؟
واصلو ارقدو واكذبو...واصلو في قلة المعروف…
ما تعرفوش انو ما يحس بالجمرة كان الي يعفس عليها...وانتم موش ملي عافسين عليها... وقد ما تكذبو وتدمغجو ما ينفعش؟....والو…
برا يعطيكم وهف...تاكلو في الغلة وتسبو في الملة..