السيد كان رايض على روحو...متركن في وزارة الناس لكل تحبها وتشكر فيها...وإذا بيه لا عملت يدو ولا ساقو يلقا روحو في فم مدفع... عملها فيه البجبوج...ما لقا ما يعمل... مشى مات ووحلو فيها...وجماعة البجبوج في القصر يلزمهم عرف جديد..
سي كريم العاقل...المتربي ...الساكت...الي موش متعود يعبر...يلقى روحو يلزمو يتكلم... ويلزمو يظاهي البجبوج...بش يكون خير خلف لخير سلف... يلزمو يكون ضامر ويتعلم النكتة والأمثال التونسية...ويحفظ آيات قرآنية وأبيات شعر وقصص...بش ما يطيحش من عينينا.. لكن سي كريم طبيب وموش متعود بالدولاب هاذا..
وفي الرسمي سي كريم يلزمو يهبط للكمبوي... وبش يأكل العصا من كل شيرة.. من المترشحين كيفو للرئاسية وما تابعهم من أحزاب ورعية وصفحات فايسبوكية... من المواطنين إلى مدخلينلهم في مخهم انو الرئيس هو لكل ويضمن الخبز والشهرية... ومن المواطنين إلي كيفي يتحاشاو القطوس المتخبي في شكارة…
ووقت ينوب علينا ربي... ويتكلم سي كريم بش تزيد العصا... كانو مع الخوانجية...بش تهبط عليه مطرقة التقدمية... وكانو ضد الخوانجية بش يأكل ما كلى البحبوج وقت عمل النداء...من سيف اللجان والثورية الرجعية... وكانو بين البينين بش يأكل من الشيرتين...المطرقة والسيف خدامين …
وخلي عاد كان ولى رئيس...ما نحكيلكمش... يولي مجبور يعبر...وعشرة ملاين واقفتلو في الدورة..على كل كلمة ينطقها…
مسخفني سي كريم وهو موش سيديجا رئيس... مالا لوكان يولي رئيس؟ شفتو محلاها المسؤولية في الديموقراطية؟