تحاليلنا طلعت غالطة وطبّتنا ما يعرفوش يشخصو...فاش بالله في حاجة ما تتنطقش وما يقع الحكم فيها الا بعد التثبت مرات ومرات والتأكد منها بالتشخيص الكلينيكي والتحاليل والتصاور وبعد ستاف يتبعو ستاف وبعد التشاور…
والنتيجة إذا تأكدت في بعض الاحيان يقع اخفاءها على المريض إذا كان الطبيب يرى داعي لذلك وخصوصا إذا الخبر بش يأثر في تدهور الحالة النفسية و في مقاومة المريض للمرض الخبيث. يعني سي عناء تقول انت الي جماعة الكل غلطت في حقك، غلطة كبيرة لا تغتفر، بالله علاش ما شكيتش بيهم والا عملت حلقة في التلفزة تبين شنوه صار وخلي كل واحد ياخذ حقه؟
يعني طبة فرنسا خير وصحاح ومخابرهم صحيحة، باهي يا سيدي يعطيهم الصحة، هيا تنجمش تورّينا تحاليلهم الصحيحة وتحاليلنا الغالطة.. اكيد هي موثقة ومكتوبة وما فمّ حتى تحليل يتعطى بالكلمة؟
وتنجمش تعطينا تقارير طبتهم وطبتنا خلينا نشوفو ونصدقوك ونكذبو خوك ولد أمك وبوك؟ سي عناء نعرف الي انت تحب البوز والظهور والانوار وخليت برش ديار بش تتشهر وبش تربح شوية فلوس، لكن ان تصل بك الحالة أنك تعمل البوز بروحك وتتمنى لروحك الي ما يتمنّاووش عدو لعدوه تولّي مريض بالحق ويجب عرضك على طبيب من اليوم لغدوه.
على كل من واجب الإطار الطبي وشبه الطبي ان يرفعو عليك قضية تشويه وتشهير ومن واجب سيد رئيس الجمهورية الموقّى ان يرفع عليك ايضا قضية تحيّل بعد ما خدعت الراجل وعدٌيتها عليه كما عدّاها علينا! سي عناء..ترفع السّتار و الا لا؟