اللي يقول إنو الثقافة الموسوعية انتهت مع عصر الأنوار ..يلزمو يراجع روحو لأنو الحكاية تمس"الأمن القومي"، وممكن تعرض معنويات "الأمن الجمهوري"للخطر. يعني اللي ينكر انو الثقافة الموسوعية "باقية وتتمدد" ببركة النقابات الأمنية، اكيد هو انسان خرج على"السياق الوطني"، وممكن خرج حتى "الوطنية" ويولي انسان مشكوك فيها ومندس في النمط المجتمعي.
ببساطة ومن غير تصعيب الأمور، اللي يقرا تصريحات النقابيين الأمنيين والبيانات متاع النقابات الأمنية يفهم إنو تونس بالحق محظوظة لأنو الثقافة الموسوعية وفات في العالم الكل إلا في بلاد التررني...كيفاش؟
الحكاية ساهلة ياسر، يكفي إنك تحاول تعمل جرد للمواهب والقدرات والكفاءات متاع النقابيين الأمنيين. النقابي الأمني هو زبدة المادة الشخمة التونسية، هو التجسيد الحي "للمعجزة التونسية"، هو العقل المطلق لابس كرافات وإلا لابس كسوة عسكرية. النقابي الأمني ممكن ما يكونش كيف نابيلون اللي شاف فيه هيغل "العقل يمتطي صهوة حصان"، لكن أكيد النقابي الأمني هو"العقل يمتطي صهوة شعب كامل"، واللي عندو ريح يذرّي عشرة.
النقابي الأمني هو "رجل دولة"، هو"إعلامي"، هو "طبيب نفساني"، هو "طبيب شرعي"، هو"مثقف عضوي"، هو "مناضل" ، هو" خبير أمني"، هو"محلل عسكري"، هو" قاضي جالس" ، هو"وكيل جمهورية"، هو "مختص في الدراسات الاستراتيجية" ، هو" عالم مستقبليات"، هو"عالم احصائيات"، هو"شيخ الطريقة"، هو"رجل اقتصاد"، هو "مختص في الارشيف"، هو"مؤرخ"..هو "صانع الرؤساء".
النقابي الأمني هو أكبر نعمة انعم بيها علينا "النمط المجتمعي التونسي"لكن نحنا ماناش عارفين قيمتها.
النقابي الأمني هو"حامي الحمى والدين" ، هو تونس اللي ماهياش متاعنا، هو الوكيل الحصري "للملاّك" الحقيقي...ونحنا "الكراية"، يعني نحنا ................... لا شيء !!!
تحيا_المواهب_في_بلاد_التررني
يسلم_ربي_وقرايتو_ومتراكو