يا حسرة على أيام بن علي، يا حسرة على زمن "الفساد الجميل" مشى كيف ما مشى زمن "الفن الجميل" …توا فسدوا كل شيء…..حتى الفساد شلكوه ، وهذاكه علاش يلزم ترجع الناس "الشبعانة "واولاد العايلات" تحكم…موش هكة يا سي زياد كريشان؟
تداعيات حرة من تجمعي "أصيل"
-زياد كريشان على أمواج موزاييك: يوسف الشاهد ولد عايلة وشبعان !!!
-مواطن تونسي: يا سي زياد راهو ما ثمة بلدي كان الجربوع (على خاطر جدود الجرابع مرتبطين بنظام الصرف الصحي متاع العاصمة)،يعني اذا عندك عقدة نقص قدام الشاهد وإلا السبسي راهي مشكلتك انت موش مشكلة الشعب التونسي، وما تنساش يا سي زياد إنو الشبع والجوع راهم في المخ وفي القلب موش في الفم وفي المعدة..وهذاكه علاش انت باش تبقى طول عمرك جيعان ولو تولي رئيس تحرير الواشنطن بوست وإلا نيويورك تايمز…
يا سي زياد، الجيعان اللي يحط روحو للبيع أكيد عندو سوم، وأكيد "أولاد العايلات" و"الشبعانين" ينجمو يشروه حتى بشوية اشهارات عمومية وخاصة، والانسان اللي يتباع هو انسان رخيص مهما غلى سومو لأنو في النهاية مجرد بضاعة يشريها اللي يدفع أكثر..موش هكة ؟