الناس اللي مازلت مصدقة انو التوافق -بالطريقة المذلة هاذي سواء للنهضاويين وإلا للمواطنين بصفة عامة -، هو ضرورة مؤلمة باش تونس تتجنب السيناريو المصري، باش نطرح عليهم شوية أسئلة ونتمنى يجاوبوا عليها بهدوء وبأكبر قدر من الموضوعية :
1- التوافق الواقعي مع المنظومة الشيو-تجمعية بدا بعد الانقلاب المصري والا قبل ، يعني بداية من حطان حمادي الجبالي رئيس وزراء ، هل انو كانت ثمة نية حقيقية للقطع مع المنظومة القديمة والا النهضة كانت تفكر بمنطق يساري لكن "مؤسلم": التناقض الرئيس هو مع اليساريين (اليسار الثقافي) والتناقض الثانوي مع التجمعيين لأنو الخصومة معاهم خصومة مواقع موش خصومة ايديولوجيات؟
2-حسب رأيكم، المنظومة الحاكمة -اللي هي منظومة عقلانية وبراغماتية رغم الرعوانيات الظاهرة الكل- كانت تربح اكثر لو دخلت في حرب مفتوحة مع النهضة (في وضع اقتصادي وأمني هش وخطير محليا واقليميا ودوليا) وإلا تربح أكثر بتدجين النهضة وتهريتها كيما تعمل توا(وناجحة في سياستها هاذي الى جد كبير)؟
3- لو كان جات ثمة ارادة دولية حقيقية لتونسة السيناريو المصري (من منطلق الموجات الارتدادية اللي اعقبت الانقلاب متاع السيسي) هل انو اي تنازلات من النهضة كانت باش تنفعها؟ يعني هل انو اللي صار في تونس مرتبط فعلا بالسيناريو المصري وإلا هو تطور طبيعي في مساو ترافقي بدا قبل تشكل الترويكا نفسها (وبالتالي الانقلاب المصري هو عامل تبرير للتوافق موش عامل تفسير ليه)؟
4- هل انو ثمة ارادة دولية لإفشال التجربة التونسية وإلا ثمة ارادة دولية لإنجاح التجربة التونسية لكن بالطريقة اللي تتحكم في سقفها القوى الدولية ؟ يعني هل انو القوى الدولية تحب التجربة التونسية تنجح( تحالف الاسلاميين والعلمانيين) من غير ما تكسر علاقات التبعية والمديونية للغرب، وإلا يحبوها تفشل (وتحل عليهم باب بلاء في بقعة تتعدا منها 25 في المائة تقريبا من التجارة الدولية وبعيدة عشرات الكلومترات على اروبا، وفي بقعة من مصلحة اروبا وأمريكا تحافظ فيها على نوع من الاستقرار الهش باش تنجم تتدخل في الجوار الاقليمي شرقا وغربا)؟
5- سؤال ربما يقلق اكثر لكن يلزم طرحو: هل انو النهضة كانت من الاول من القوى الثورية ، وإلا فقط كانت جزء من "الطابور الخامس" للمنظومة في "الشرعية الانتخابية" كيفها كيف التكتل ، وكيفها كيف حزب العمال والوطد وبرشه قوى قومية؟ يعني بحكم هيمنة الخطاب والأشكال الثقافوي الهووي على الاطراف هاذي الكل، هل انها كانت تنجم تخرج على هيمنة النواة الصلبة متاع المنظومة (مهما كانت ارادتها) وإلا كانت محكومة جوهريا بالتبعية ليها ؟
6- اذا كل شيء قابل يتبرر ، هل انو تبقى ثمة امكانية لمحاسبة الاحزاب والشخصيات السياسية مهما كان اداءها؟ يعني اذا ما نفترضوش انو ثمة على الاقل زوز ممكنات في اي وضعية ، هل انو من حقنا نحاسبو اي شخص بمن في ذلك بن علي والمنظومة متاعو؟
7- باش نفترض جدلا-او بالأحرى باش نفترض عبثا- انو التوافق باهي للنهضة ولتونس، جاوبوني على السؤال الاخير هذا: التوافق لغة يعني التشارك ، يعني حركة في اتجاهين وتعبير على تنازلات من زوز ارادات ، تنجموش تقولولي وقتاش النداء (الباجي) توافق معاكم، وقتاش ظهرت قيادات تونس تعاطف وإلا تفهم لأي حاجة تفكر فيها النهضة وهي ما تعبرش على مصالح المنظومة القديمة، وقتاش قيادي من نداء تونس برّأ النهضة من الارهاب وإلا حتى من احداث باب سويقة، وقتاش الباجي حكى عليكم بمنطق الشريط (والنظير ) موش بمنطق التابع والخاضع )واللي عامل عليه مزية)؟
وإذا حبيت نلخص الاسئلة الكل في سؤال واحد ، انجم نصوغو بالطريقة هاذي: شكون ربح اكثر من التوافق، الثورة والزواولة اللي وراها وإلا نداء تونس والمُركّب المالي-الجهوي-الأمني اللي وراه، واللي من المفروض انو الثورة قامت ضدو باش تخرجو من مركز الحياة السياسية موش باش يرجعوه قطاع الطرق والتوافقيين لقرطاج والقصبة وباردو؟