النهضة إذا عندها جهاز سري، علاش ما صفّاتش أكبر المجرمين متاع التجمع واليسار اللي عذبوا أولادها وشردوهم وعيشوهم حياة الذل اكثر من عشرين عام ؟ علاش الجهاز السري متاع النهضة ما استغلش المد الثوري بعد 14 جانفي 2011 وصفّى الجلادين والسياسيين اللي الضحايا متاعهم الكل يعرفوهم بالاسم؟
علاش النهضة قبلت باش تحتكم للقضاء مع المجرمين هاذومة وقبلت بحكم القضاء حتى وهو موش في مستوى الجرائم المنسوبة لأسقط ما أنجب نظام المخلوع؟ علاش الجهاز السري متاع النهضة ما تحرك كان في فترة الترويكا، وهو من المفروض ينظفلها الساحة من أعدائها قبل ما تحكم؟ علاش البهامة متاع اليسار الاستئصالي تخليه يستعمل نفس السيناريوهات اللي استعملها بن علي ويتصور انو العباد ممكن تصدقو، وعلاش لتوا اليسار مازال يفكر بمنطق ستالين وأنور خوجا وبول بوت وكأنو مكلف بمهمة عند عزراييل والصناع متاعو، وزيد ما يحشمش وقت يقول انو" ديمقراطي" و"تقدمي"؟
المجرم بن علي، بشكون خدم باش يقتل عشرات النهضاويين ويعذب الآلاف ويشردهم ويعيشهم مواطنين درجة عاشرة...موش اليساريين؟ شكون كان في قيادة الآلة القمعية متاع بن علي( الالات الحزبية والامنية والثقافية والإعلامية والنقابية)....موش اليساريين؟ شكون دمر البلاد وردها مزرعة عايلية لبن علي وانسابو، موش خرافات الدفاع على النمط المجتمعي اللي دافع عليها اليسار؟
قداش من يساري مات ملي استقلت تونس على يد واحد نهضاوي، وقداش من تونسي مات على يدين اليساريين في وزارة الداخلية ومراكز الإيقاف وفي الحبوسات؟ قداش من نهضاوي كان جلاد وإلا مرتزق وإلا كلب حراسة إيديولوجية للنظام في عهد بن علي وقداش من يساري؟
مختصر القول: مهما تزايدوا على النهضاويين وعلى اليسار الوطني اللي مازالت مشكلتو مع الظلم موش مع الهوية...ومهما تحاول وسائل الاعلام تبيض تاريخكم المشبوه، التاريخ يشهد انكم أكبر حليف للأنظمة الاستبدادية والعسكرية والانقلابية مادام ضحاياها الاسلاميين والزواولة اللي ما يفكروش كيفكم، والتاريخ يشهد انو يديكم ملطخة بالدم متاع التوانسة وقلوبكم سوداء كيف افعالكم قبل الثورة وبعدها....
ومهما تعلّوا أصواتكم ويكثر الحس متاعكم، في النهاية ماكم إلا طابور خامس في خدمة اسيادكم في المافيات العايلية والجهوية اللي عاملتكم كيف سروال الجندي….كل مدة يلبسو واحد.