المليون مرا اللي انتخبوا "وريث بوقيبة" وحامي " النمط المجتمعي"، المليون مرا اللي مصدقين انو " العيلة الديمقراطية" تفكر بالحق فيهم بعد الانتخابات وإلا في قضية مافيهاش النهضة وتركيا وقطر، المليون مرا هاذومة موش من المفروض يطلبو من الباجي ومحسن مرزوق ومولى الحنة اللي في يديه ياخذو موقف من قرار الإمارات ؟
القرار الإماراتي الفضيحة، واللي يمنع النساء التوانسة من دخول الامارات( أو حتى انهم يعتبروها محطة عبور / سكال) يحكوا قدّام زوز حقائق:
- اول حقيقة هي معنى " مرا ونص" عند ممولي مشروع تونس واغلب الغرف المظلمة اللي تدعي الدفاع على" النمط المجتمعي التونسي": المرا التونسية مرا في بلادها، لكن هي نص مرا في الامارات( اللي تمول في مشاريع شخصية وحزبية في تونس، أهمها" مشروع تونس")
- ثاني حقيقة هي معنى " التبعية" و" الذل" موش كان لأروبا وامريكا بركة ،تبعية وذل لأعراب كان من المفروض اول قرار تعملو تونس هي قطع العلاقات معاهم،...لكن" هيبة الدولة" ما تصلح كان للاستهلاك الانتخابي وإلا ضد الزواولة اللي ما عندهم كان ربي.
وبما انو الإمارات بالت علينا وعلى شرفنا( حاشاكم) ما فيها باش كان نقصّوا العلاقة مع قطر ونزيدو الضرائب على السلع التركية...موش هكة سي محسن؟
والله العظيم نكتب بالغصّة - وأكيد أغلب التوانسة كيفي وربما اكثر-…لأنو الكلنا نعرفو انو السياسيين يولي عندهم عجز جنسي- عفوا عجز قيمي- وقت الحكاية تكون فيها فلوس الامارات وإلا السعودية.