من باب ممارسة حق وفريضة وهواية النقد الي تحرمنا منها لعقود والّي طبنا على جالها بالسجون والمحن، قلنا برّا نلوموا الرئيس على تقريب بعض الغربان الي وصمت الثورات العربية بالعبرية، وفتح القصر قدامهم ونحن معملين على ربي سبحانو ثم على راجل حر ونظيف ويؤمن بالثورة ومختص في الدستور.
كان يمكن نزيدوا ننقدوا سي قيس أكثر، ونتوسعوا في الأمر، أما وقت تلفتنا نقلوا اعلام العار ركب على الموجة بطريقة اخرى، بعد ما شاف الناس ناغرة على الثورة وهابلة من واحد عاق يتاجر بوالديه حاشا رجال وحراير ڨابس، كي اعلام الشنار شاف اوفياء البلاد يلوموا في الرئيس، دخلت كلاب عبد الوهاب عبد الله على الخط، ودشنوا حملة خبيثة لتشويه الرئيس المنتخب،
قالوا بارشا كلام فات العار من غادي، قالوا تونس ما تستاهلش هذا، تونس عمرها ما وصلت للمستوى المتردي هذا، كرطاج تهنتل ولازم يوقف عند حدوا السيد هذا.. ثم شكون قال وقتاش نبدوا إجراءات العزل.. أي أي! قالوا أكثر من هكا على منابر إعلام العار وجابوا ڨداش من ڨرنيكور وڨرنيكورة باش يشوهوا الراجل النظيف.
شوفوا يا كلاب الدم! خلينا نفهموكم في هبتنا نحن باش ما يتخلطش عليكم الامر، نحن عنا مشكلة فعلية مع إيران، موش على خاطر المذهب، على خاطر ذبحوا أطفالنا ونسانا في سوريا وركّبوا مجرم حرب طائفي على ثورة الشعب، وعلى خاطر وعدونا بتحرير القدس ياخي استعمروا 4 عواصم عربية، على هذا أصبحت عنا حساسية كبيرة من المذهب الي يحكموا بيه جيرانا الفرس، هذا علاش فيسع تحسسنا من علاقة قيس بالشّبيح العاق.
هيا تاو نجو لهيبة الدولة وهيبة القصر، وكيفاش قيس لخبط وخلط، أي يا أدعياء اما أحسن يخلط في الإتيكيت والا يخلط في شرف الرجال والحراير ويخلط في دمهم ولحمهم ويدلي رقابهم في حبال المشانق! اما خير قيس الي شنعتوا بيه كيف تعثرت شوي بروتوكولات، والا جماعتكم الي ذبحوا خيرة مجاهدي تونس ولحقوا رمز تونس صالح بن يوسف لألمانيا وقتلوه وكي روحوا سكروا على نخب الجريمة! ا
ما خير الي انتهك البروتوكولات والا الي انتهك الاعراض وسجن أكثر من 30 الف وشرد عشرات الآلاف ودفن الشهداء في الجسور واغتصب الحرائر في شهر رمضان! اسمع ايها الجمر الخبيث، اما أحسن إلّي تعثرت في يديه بعض التقاليد الرئاسية الموروثة، والا الي سلم لبلاد لحجامة واخوتها يزطلوا فيها ويتقاسموا مقدراتها ويستعبدوا رساميلها، آخي هزكم وافزعكم تضارب التصاريح حول اقالة ممثل تونس في الامم المتحدة، وما هزكمش بورقيبة كي فك مرت الراجل! هزها من تحتو عين تشوف وعين تبكي، وما هزكمش بن علي كي سحت نعيمة بعد عمر طويل وجاب عليها عشيقتو، ما هزكمش الدم والخيانة والغدر والرئاسة مدى الحياة، وهزكم بيان رئاسي حبّرو قيس تو يصلحو ويحبر غيرو، أما الدم كيفاش باش يتصلح!!!
شوفوا يا زرازيم الهرية، إذا كان حرمة الدم أعظم من حرمة الكعبة الشريفة، مالا بروتوكولات القصر نعتبروها نكتة قدام حرمة الدم التونسي الي سال بغزارة، ما سيلوش قيس سيلوه اصنامكم إلّي مازلتوا عاكفين عليهم.
شوفوا يا بوم الخربة، قيس راو ما جابوش منديس فرانس والا جباتو المخابرات الاجنبية في ليلة ظلمة، قيس جباتو الصناديق، وتخرنينا معاه تخرنين تحسين وحذر موش تخرنين تدمير، لانا نحن بنادم وهو بنادم، واش دخل الي مشهم بنادم!
شوفوا يا حدج الدفلة، انا لو كان ليا وجاء بيديا، نجيب عرش أولاد عسكر الكل وعرش افيال الكل، يطهروا ذريهم في قصر قرطاج ويشعلوا فيه النجمة سبعة أيام وسبعة ليالي، يطرب الطبال والزكرة ويحنوا لبناويت في غرفة النوم! علاش الحجامة خير منهم!! تاكل الناس وتشرب وتسهر ويخلوا ليكم الفرت وشقوفات الفانتا وكرادين البسكوي الڨلاصي ملوحة في الصالة الكبيرة وفي بهو الشخصيات المرموقة، و أنتم تلموا وتمسحوا وتسيقوا، وبعد نقولوكم، القصر هاو رجع كيما كان، اما الرجال الي تقتلت في الحبوسات قبل آذان الفجر ما ترجعش لقيام الساعة.