شوف خلينا نسمعوا بعضنا! الغنوشي يشرح كيما يحب بطريقتو كسياسي، والفخفاخ يحتج كيما يحب بطريقتو كمكلف، والقروي يركش كيما يحب بطريقتو كمطلوب لعدالة الشاهد، والشاهد يناور كيما يحب بطريقتو كمطلوب لعدالة نبيل القروي... ونحن ما عناش حسابات كيف الأحزاب، وعلى هذا نحللوا كيما نحبوا.
شوف ربحت النهضة، مشت باش تشكل حكومتها الي يقولوا ثورية، في نهارتها جماعة الثورية مشوا للرئيس قالولوا تهني انت باش تعين شكون يشكل لحكومة.... عملنا دورة كبيييييييرة وما صار كان كلام جماعة الثورية، ورجّعوا الأمر للرئيس كيما وعدوه وقت الي زاروه في دارو، وكان موش موافق أما ما حبش يكش عليهم.
أي يبلعها الغنوشي زعمه؟! كيفاش موش هو الي قال النهضة حربوشة تو يبلعها النداء، يبدا ما بلعوشوا السبسي والنداء في حرابشهم باش يبلعوه جماعة الثورية!!! الغنوشي معروف ما يعيّطش ياسر ودموا بارد، اما يشد في قلبوا وموجع في ردودو، أخطر ما في الغنوشي انو ما يستعملش الأمراض البدنية باش يفتك بضحاياه، ديما يستعمل الامراض النفسية، يغتالهم نفسيا وما يخلي حتى تراص!"طبع باهي والا خايب هذا موش موضوعنا"
خلينا نفهموا الي حكومة الفخفاخ "كيما يحب عليها" طاحت نهار الجمعة 10 جانفي، خلينا نفهموا زادة الي زاد الطين بلة تصريح الفخفاخ الي قال فيه المعنيين بالحكومة هوما الي انتخبوا الرئيس! ولاّش الأمر موش متعلق بالفصل 89 من الدستور، ولينا نمهدوا لصلاحيات مطلقة لرئيس الجمهورية غير معلنة وغير موثقة، وربما تكون بروبة تمهد لتعديل الدستور.
خلينا من لغة مستعدين نتنازلوا على مطالبنا لصالح تونس، خلينا من البلاد في وضع دقيق ويلزمنا نصوتوا على حكومة الفخفاخ باش نبدوا نخدموا على رواحنا، خلينا من قلب تونس يبقى في المعارضة باش يقويها، وخلينا من لا للإقصاء ولابد من مشاركة قلب تونس... خلينا من هدرة السياسيين راهي تّوهنا بعييييييد.
شوفوا ياجماعة الثورية! أنتم داخلين من اول مرة ناوين على الشر، تحت أي طائل لازمكم تعملوا حد لتواجد النهضة في السلطة بشكل فاعل طوال 9 سنوات، أما ترحلوا بيها للمعارضة وهذا ما قدرتوش عليه، وإما تقزموها وتخلوها عنصر ثانوي ما عادتش هي ركيزة الانتقال، كان هذا هو الهدف متاعكم لا ثورة ولا سيدي زكري! في المقابل النهضة قالت هذا ربي وأنا تحتو كان نخرج من السلطة، ومستحيل نصبح عنصر هامشي وغير مؤثر.
انتوما ما خليتوهاش ترشح من داخلها وزدتوا طيحتوا ليها المستقل، وبعد جبتو ليها الفخفاخ وقلتو ليها ايا انعلي بليس وصوتي عليه! فيبالكم هي باش تهد حتى لتدعثر ملفرحة وتلبس شلاكتها بالمقلوب وتجي تبصم ليكم وتزيد تعطيها بزغروطة!
بلغة ساهلة انتوما حبيتو تاخذوا للحُكم مرا أخرى، والنهضة قالتلكم راني أم الولد ما نتخلاش وما نحملش الضراير، وشوف شوف نرضاش بشوي جواري.. جراش ليكم وليها كيما جرا للأعرابية أم الولد الي تزوج عليه راجلها مرا صغيرة، وفي الصباح تتعدى الطفلة قدام بيت ام الولد وتقول:
وما تستوي الرجلان رجل صحيحة**ورجل رمى فيها الزمان فشلت.
وفي المساء تعاود ترجع وتقول:
وما يستوي الثوبان ثوب به البلى ** وثوب بأيدي البائعين جديد.
تقلقتش ام الولد، خرجتش للطفلة الجديدة قالتلها:
نقل فؤادك حيث شئت من الهوى ** ما القلب إلا للحبيب الأول
كم منزل في الأرض يألفه الفتى** وحنينه أبدا لأول منزل.
بالنسبة لمستطرف الابشيهي وعقد ابن عبد ربو، القصة وقفت هنا، أما بالنسبة لعيون أبي قتيبة والا هو كان صدقني ربي لإمتاع ابي حيّان، الطفلة بعد ما سمعت شعر ام الولد، باتت ما صبحت... والله أعلم وصلى الله على محمد وعلى آله وصحبه وسلم.