عَرْف أو صاحب مؤسّسة خاصة قال للعملة انّه سيُعطيهم فلوس العيد (تسبقة أو منحة) نهار الوقفة... بشّروا أولادهم بموعد اشتراء الخروف... خرجت الزوجة اشترت السلق والمعدنوس والساشيّات متاع اللحم والحكّاكة والفحم والشوّاي...ومضّت السكاكن والساطور وحضّرت الشقالة وقشّرت الثوم وعمّرت الكوانين وحطّت البخور وقعدت تستنى ...
الأولاد حضّروا الحبل إلي باش يربطوا به العلّوش وأعطوا موعد لأولاد الحومة باش يتقابلو في البطحاء ويعملو مبارزة بالخرفان … "بابا باش يشري علّوش عنده قرون"… "بابا باش يشري علوش رأسه أسود"… "علّوشنا يغلب علّوشكم تو تشوف"…
نهار الوقفة العرف ما جاش مشى للنفيضة يجيب في "الحوتة" إلّي باش يعيّد عليها … مسكّر تاليفونه وكلّم الكاتبة قال لها : "الفلوس بعد العيد" أنا déplacement…
ذبحهم بسكّين حافية … أحدهم روّح إلى اهله في قفصة بخفي حنين في الثنية عمل حادث مات… الثاني طلع له الدمّ 22 وكاد يتجلط …
رأس مال مُتوحّش … يضحّي على أولاد الحفيانة ويذبحهم أمام أعين زوجاتهم وأولادهم لا رحمة ولا شفقة… هذا هو المعنى الحقيقي لـ les barbares.