الناس الذين لم ينجحوا في تدبير بقعة في البرلمان... وينتظروا في بليصة في الحكومة لواحد من القائمة باش يطلع إلّي بعده... وإلاّ حالل جلغته للحزب باش يعطيه شهرية وإلاّ يدبّر له بقعة في مؤسسة من المؤسسات…
امشوا اخدموا على رواحكم!!!!!!! امشوا جرّبوا تاكلوا من عرق جبينكم!!!!!!!! امشوا تعلّموا المواطنة موش في مكاتب الأحزاب وبلاتوهات الإعلام وقبة البرلمان…
وإنما بشدّان الصف في مكاتب التشغيل لتحصل على عقد "كرامة" وإلاّ حتى cdd في مركز نداء (centre d'appel)... وخوض معاركك مع تفقدية الشغل ومع وزارة الشؤون الاجتماعية ومع القباضة المالية ... وتعلّم تجاوب زوجتك على سؤال "صبّوشي" وتمشي للبوسطة تسأل "جاتشي"... تعلّم تشدّ الصف في الصندوق القومي للشؤون الاجتماعي باش تأخذ historique... وتعلّم كيفاش تصبّ ورقة استرجاع مصاريف علاج وتعلّم تتفاعل مع صدمة "الدواء هذا ما فيهش تغطية اشريه على حسابك"...
تعلّم تحسّ بوجع "الدواء موش موجود" و"ارجع الجمعة الجاية" و"الأطباء مضربين" ... تعلّم تطلّع مضمون من البلدية وتعلّم ما تقضيش أمورك بالتاليفون... تعلّم معنى "العمل" قبل ما تعمله شعار لحملتك الانتخابية وعيش ما يعيشه التونسي من ضغط وخوف يومي أمام رداءة وسائل النقل ومن غياب للحد الأدنى من البنية التحتية...
جرّب تعيش تونسي... وتعلّم تخاف من السحاب وتتفجع من المطر وتجري تروح بصغارك من الروضة باش ما يطيحوش في بالوعة... تعلّم تعمل عتبة في باب دارك باش الأمطار لا تجرف أثاث منزلك لأنّ البلدية لاهية في تجميل الواجهات للإنتخابات ونسات تسرّح المجاري وتسكّر البلالع....
جرّبوا كل هذا وقتها تُصبحون مواطنين وتنجّموا تترشحوا وينتخبوكم الناس... حملة عيش تونسي فشلت لأنّ من يديرها موش تونسي.... وبرشة جماعة فشلوا لأنهم موش عايشين كالتوانسة... التوانسة لم ينتخبوا الناس إلّي ما تشبهلهمش... موش في الأيديولوجيا وإلاّ في "العائلة" السياسية وإنما الناس إلّي موش عايشين كيفهم…
امشي اخدم على روحك....