بعيدا عن الوضع الاقتصادي الراهن في البلاد، باقي فمة مشكلة في (1) المصطلحات، وفي (2) المنهجية.
(1) اقتصاد مستقر في لقراية متاع علم الاقتصاد، يعني (Stable) معناها وقتلّي يتلقى صدمات عشوائية واللاّ موش عشوائية، داخلية واللا خارجية، تلقاه عندو القدرة بش يرجع للتوازنات الأصلية متاعو.
وموش معناها "حالة مستقرة" بالمعنى الطبي للكلمة يعني ما زادتش تعكّرت. يعني، نسبة نمو محتملة اقل من 1٪ ونسبة بطالة هيكلية حوالي 16٪، ودين عام غير مستدام، ونسبة تضخم اعلى من متوسط المنطقة… وتقولو "اقتصاد مستقر (Stable)، آنا هنا نولي ماعادش نفهم.
(2) آش بيه البنك المركزي في تحليلو للوضع متاع الاقتصاد الكلي ديما يركّز على العجز العام والخارجي اللي هوما حسب رايو موش تابعينو، ويركّز زادا على السيولة اللي هي حسب رايو تابعتو هو.
هنا مافماش توازن منهجي في التحليل بحيث البنك المركزي قاعد يعمل في انجازات جبارة والحكومة واللاّ وزارة المالية والتجارة والاقتصاد والتخطيط هوما السبب في شبه الركود الاقتصادي الحالي.
وهذا في الحقيقة موش ممكن بش نعتبروه "تحليل للوضع الاقتصادي" بقدر ما هو سرد للإنجازات متاع البنك المركزي اللي هي في حد ذاتها ميش محل إجماع إذا كان قيمنا الاداء متاع المحافظين المتتاليين والسياسات النقدية اللي تم تطبيقها من عشرة سنين فايتة مثلا..