قاعد نشوف في برشة هذيان متاع يساريين ساندو الإنقلاب يوم 25... مشى في بالهم انو ضد النهضة والفساد ما فهموش وقتها انو مخطط ليه من طرف الإخشيدي وأزلامه للإنقلاب على دستور ديمقراطي...وهذا يتحينو في الفرصة ليه منذ انتخابه... وذلك لفرض دستور حكم فردي استبدادي.. و بالضرورة نظام فاسد ككل حكم فردي…
وذلك بتزييف إرادة الشعب التونسي الحقيقية المطالب فقط بالعيش الكريم في بلادو.. إضافة للحرية إلي اكتسبها بفضل الثورة ولي موش مستعد يفرط فيها لأي كان.. والدليل تكاثر نضالاته اليومية في كل ربوع البلاد من أجل مطالبو الإجتماعية ...منذ الإنقلاب...ولي يقمع فيها قيس الملهم العظيم بتوظيف البوليس وسعيه المحموم للهيمنة على القضاء لتوظيفه ضد الاحتجاجات الاجتماعية إضافة للحريات.. كما يفعل كل شعبوي...وسيكون لا محالة أتعس من بن علي لو استقر له الحكم الفردي.. مسألة عقائدية عندو... أقراو شمعناه بني قاعدي تو تفهمو.
عاد ها اليساريين وقت تقرأ كل يوم تدويناتهم وتعليقاتهم منذ الإنقلاب... تكتشف انهم إما غير مطلعين على "فكر" قيس سعيد الموجود بكلو عند الشيخ ڨوڨل...وبعض كليكات تكفى باش تتطلعو عليه... وتستنتج انهم ما يقراوش وينظرو كمام …
أو أنهم يعرفو وهوما من جماعة الموقع قبل الموقف والموقف يكون ديما حسب ما يفرضو ميزان القوى السياسي الأغلبي في تلك اللحظة للتمكن من الموقع... أو انهم عندهم حقد وسخط على النهضة وجعلو منو التناقض الرئيسي في المجتمع... عوضا عن التناقض الرئيسي الطبقي في المجتمع. .. بما انهم يندعيو انهم يساريين.. موش شعبويين.
وثمة إلي عندهم كل هذا في قالب بعضو…
وثمة زادة إلي موش داريين شنوا الرئيسي والثانوي بين التناقضات المجتمعية... شكشوكة في مخهم. عاد الجديد... وبما ان الواقع هو إلي يحدد مفهومية الأشخاص... وواش يتبدل في طاست أمخاخهم بفعل عمل السينابسات إلي فيها ... قاعد نلاحظ في بعضهم بدى يفيق على روحو... وعلى خطأ مساندتو للإنقلاب... بعد ما شاف آثارو الشعبوية والإستبدادية والشمولية التدمرية للبلاد والعباد... والحكم الفردي إلي يحب يعملو كيف حكم بن علي الاستبدادي والفاسد...وبش يكون أتعس منو.. في الميدان السياسي والإجتماعي... وما عرفش كيفاش يتراجع على موقف غالط... ودورها هذيان... وهزان ونفصان.
وأصبح يضرب في كل الاتجاهات...كيف الأعمى إلي ما يعرفش وين الثنية... وموش عارف البوصلة الحالية وين..كيف هاك الغريق إلي ما يعرفش يعوم ويفرفش في الماء باش ينقذ روحو ياخي يتعب ويهبط فوندو ويغرق... في عوض يستلقي على ظهرو وما يعملش حركات زايدة ويتعب روحو... وقت الماء المالح بطبيعتو يخليه يطفو فوقو... خاطر عندو الهواء في كرشو بما انو الماكلة تعمل الڨاز بدليل أنو يفسي ويبص... بنزرتي جربها من قبل... ولد بحر البطاح صارت عليه في صغرتو .. وقت كان ينڨز من فوق البطاح...الحكاية تعلمها من الواقع.. وتوا يكلم فيكم .
اليساري يا أشاوس الإنقلاب ... مسموحلو باش يغلط في تقديراتو السياسية ...كيف أي بشر... ماهوش نبي منزل. وإذا كان يعتبر روحو نبي منزل ما يغلطش وعندو الكلمة الإلاهية ... هو موش يساري. وعليه ببسيكياتر لا غير…
فبحيث... مشروع قيس سعيد إلي قاعد ينظم فيه.. باستعمال جهاز الدولة وموارد الدولة.. إلي تسلط عليه باقتراف الكثير من الجرائم ضد أمن الدولة الداخلي المضمون بدستور الثورة الديمقراطي ... مشروع انقلابي لتأسيس حكم فردي... شعبوي وشمولي وفاشي... بتدليس السيادة الشعبية... وإرادة الشعب التونسي الي اكتسب حريتو بفضل الثورة... ويحب اليوم يقضي عليها مكاسب الثورة الإخشيدي..
وملخر هو يخدم باش يجعل من الشعب رعية لدكتاتور فاشي... ولا مواطنين... وقت الشعب يطالب اليوم بتحقيق حقوقه الإجتماعية والعيش الكريم...وموش بتغيير النظام السياسي. وهاكم شفتو الاستشارة لكترونية كيفاش عملت فلوب.
وبحيث... هاذي هي البوصلة... ساهلة ماهلة راهي...للي يحمل قيم اليسار التاريخية ... وموش يمركي في روحو عليه. ويلزم نقولوها بكل وضوح... وبدون لف ودوران..ونبعدو على التلوعيب... والهزان والنفضان...والموقع قبل الموقف... وكل الترهلات.... والخرمولوحيا اليسراوية في شكلها َوالمعادية لاستحقاقات الثورة في جوهرها... ونمنعو بارواحنا…
قالقادم أتعس...خاطر إلي عملو الإخشيدي لحد اللحظة... هو مجرد مفتحات... أو بازة الدار الشمولية... إلي يخدمو فيها باندية البني القاعدي... الفاشيين .
كابيتو؟