إلي يحسب وحدو يفضلو. مواطنون اعلنو ترشحهم.. او عبرو على نيتهم في الترشح ...او حتى ما عبروش آما يمكن يعملوها. تم اعتقال البعض صدفة باقتراب تاريخ 6 تكوبر... مثل المرايحي البارح…
او مستدعدين للبحث.. مثل المكي.. او موجودين في حالة اعتقال قسري من قبل... او عندهم دوسيات وفي حالة سراح مؤقت... او مجبورين حفاظا على حريتهم على الغربة... أو متعودين يترشحو لكن دخلو للسرية الإعلامية موش ما يقعش تداول اسماؤهم على مواقع التواصل ويستهدفو.. الخ ..
الغريب... انو لا ثمة تضامن مواطني مع ضحايا القمع هاذم.... ولا حتى دفاعا على حق الشعب في انتخابات حرة ونزيهة وشفافة... وهو مكسب كبير برشة ... من مكاسب الثورة.. كان ما زلنا نتفكروه.
عاد خوكم بعد اعتقال المرايحي... و استدعاء المكي ... حبيت نزيد نثقف روحي. ياخي درت على عديد الصفحات والمواقع متاع أحزاب وجمعيات الخ... نثبت ثماش مواقف تنديد وتضامن ومطالبات... كيف العادة... ياخي راصاتلي بخفي حنين.
تي ثمة حتى إلي يقول بحمق... متهم بالفساد ما نتضامنش معاه... على أساس أنو متهم من قضاء مستقل.. وموش بتعليمات ممن وظف القضاء ... والمتهم متمتع بقرينة البراءة وبشروط المحاكمة العادلة.
ويتزلوص يا بوقلب... متناسي علاش تفكروه اليوم وموش قبل..وعامل فيها موش فاهم اللعبة الجديدة. وطبعا موش نحكي على صفحات و مواقع اللمبن..
هاذيكا حثالة مجتمع وسائل التواصل... المتشمتة. ..وتقول اضرب واحنا معاك... وهاذي ما تتهزش حتى بمقص النار... ويا ويل أصحابها ويا طول ليلهم... نهار آخر.
فبحيث .. إلي هذا عامل فيها اخطى راسي وأضرب. خليني بعيد .. هاني رايض.. ودبر راسك معاهم... بعيد عني... حياتي موش عذاب. وبحيث... زعمة يا جماعة... دخلنا في مرحلة إخطى راسي واضرب؟
آما يظهرلي.. يبطى شوية... ولي يحسب وحدو يفضلو . خاطر كيما يقول مولى المول... إني وراءكم يا خونة... يا فاسدين.. يا ميكروبات.. المدافع على منصاتها .. والزمن قصير.