رئيس الجمهورية: الدولة ستواجه المجرمين الذين ارتموا في أحضان عصابات في الخارج….و لا حوار وطني مع الفاسدين… والشعب يريد…
المشيشي: يجب وضع حد لقطع الطرقات وقطع الإنتاج في المصالح الحيوية…بالتعاون مع الأمن والنيابة العمومية…
القضاة: النيابة العمومية في اضراب ولا دخل لها في الموضوع…
بعض الأحزاب السياسة.. نعملو حوار وطني تو نسلكوها…وكل واحد منهم شيطانو في جيبو…
بعض الأحزاب الأخرى… إيجاو نعملو ثورة… وهوما ميكروسكوبيك وما يتشافوش في الحوم…وغير قادرين على قيادة الاحتجاجات…
بعض الأحزاب الأخرى… نسادنو الاحتجاجات الاجتماعية… وتو نشوفو وين ماشية الأمور…
النهضة…لكلنا إخوة… يلزم حوار وطني فيه الناس لكل إلا الي يقصي روحو…
ائتلاف الكرامة… حكايتكم لكلكم فسفس… أحنا جديين… هانا لقينا دواء للكورينا… وتونس تنجم تربح منو آلاف المليارات (آما ما وضحوش مليارات بالمليم التونسي… او الدولار أواليورو… خاطر آلاف المليارات بالدولارات او اليوروات يعني بليونات يا بوڨلب… وميزانية تونس ما تجيش بوربوار قدامهم.. وقتها تونس تولي أغني دولة في العالم… بالنسبة لعدد سكانها.. والدخل الوطني بالنسبة لكل مواطن يقفز للمريخ… ولا عاد حاشتنا لا بملح ولا بترول) …
بعض الأحزاب الأخرى…حوار برئاسة قيسون… بدون قلب تونس والكرامة… والنهضة تو نشوفو…
حزب عبيريرة بن علي وجوقة المتحولين سياسيا طبالتها…أحنا ما نتحاوروش…يلزم نقصيو النهضة ونستأصلوها من السياسة … وبعضهم يخممو يلزم لكلهم يرجعو للسجون وموش كان إلي تثبت عليه جريمة… وقتها بلادنا تولي كيف سويسرا…
المجتمع المدني والإتحاد… موش عارف كوعو من بوعو مع هذا المشهد الكفكائي…وكل طرف منو يغني على ليلاه…
إذاعة المنستير… شنوا رأيكم يا مستمتعين… أنتم مع تدخل الجيش لإنقاذ البلاد أو ضدو؟
ريتوهم الأحزاب هاظوكم لكل؟
المواطنين باعثينهم… في سبر الآراء الأخيرين… بين الثلثين والثلاثة أرباع… ما يصوتولهمش… لكنهم يتكلمو بكل وقاحة باسمهم…
وتعرفوش علاش؟
خاطر المواطنين يقولو… أريد أكلا ونحب نعبي قفتي كل يوم… وڨاز… وشغل…وصحة عمومية… وتربية عمومية…وتنمية جهوية… إلخ…وهوما لا لقاولوهم حلول في السلطة… ولا حلول من موقع المعارضة تعطيهم أمل في إمكانية التغيير…
لكلها عاملة فيها… برا أكاكا… برا أكاكا… الحاصيلو… انشالله ما نسيت حد… وما ظلمت حد…