اليوم شهداء معركة الجلاء في مقبرة الشهداء ببنزرت ... راهم يتقلبو في قبورهم... استشهدوا من أجل الوطن...ربي يرحمهم وينعمهم..لكن الوطن اليوم في خطر محدق.. شخصيا كنت صغير برشة وقتها... لكني نتذكر اني كنت نسمع في الكرتوش يخيط... وصوت الطيارات المرعب إلي سمعت كي كبرت انها لوحت النابالم على المدينة العتيقة..
وكانت المرحومة والدتي ملمدتنا آنا واخوتي في حجرها كيف الدجاجة مع فلالسها... وجهها يصفار ويخضار.. وهي اتمتم ما نتذكرش في شنوا... كيف في النهار إلي كانت تستنى فيه في الوالد ربي يرحمو إلي مشى يتظاهر قدام ڨازرنة سيدي احمد...صور عمري ما ننساها... ونقوم اليوم الصباح... ونشوف مسرحية متاع قلة حياء...متاع des parvenus…
جابو كمشة ما يجيوش حتى ميليشيات نوع لجان رعاية او لجان يقظة..... يسبو ويخونو في جزء من الشعب من اولاد بلادهم من مختلف المعارضين للمنقلب على الدستور... ولي بالضرورة باش تلقى من ضمنهم شكون عندو شهيد من اجدادو او من عايلتو في مقبرة الشهداء تلك!!!
يا بوڨلب... يا بوڨلب... وزيد انعدام الأخلاق هذا يصير في مقبرة يا بوڨلب... قداش انعدام أخلاق!! وزيد يمجدو في انقلابي على دستور ثورة حرية وكرامة ... لا ناقة له ولا جمل في النضال الوطني ضد الاستعمار... بما انو يعتبر الاستعمار كان حماية للشعب الذي يريد!!!
وزيد عندو ما ثماش علاش يعتذر ماكرون الرئيس الفرنسي الحالي... للشهداء إلي عامل فيها يقرأ عليهم في فاتحة ويحطلهم باقة زهور ... وعلى جرائم الحرب إلي اقترفها رئيس فرانسا السابق ديڨول في بنزرت بتعليماته المباشرة وهذا ثابت في كتب التاريخ ... وضحاياه التوانسة معظمهم مدنيين متطوعين للدفاع عن بلادنا.. ومدفونين في تلك المقبرة!!! وهي جريمة حرب لا تسقط بمرور الزمن..
وكذلك الجرائم إلي صارت قبل في ساقية سيدي يوسف... وهي أيضا جريمة حرب لم تسقط بمرور ... وقبلها برشة جرائم حرب أخرى في مختلف أنحاء تونس... منذ استعمارها في 1881..
وهذا الإنقلابي فرحان بالفارينة...وموش مشكل كي تكون في مقبرة... ويتحي ويزكي علي اختاروهم للمسرحية النذلية هاذي ...باش يقولو إلي قالوه... وزاد عليهم... وعلى ما وصاوه... ومانيش باش نحكي شقال... خاطر عمرو في سبرنا كلام هكة ما يتقال في مقبرة... وزيد في حضور الشهداء.. هيكا الفيديو موجودة في كل مكان…
وبعد عملت دورة في بنزرت.... بعد ما رفعو عليها الحصار...نلقاها فارغة من الناس على غير العادة في نهار عطلة... والشعب المعدوم... المزعوم يريد... لا هبطلو ولا فرح بيه. فبحيث آش مازال عاد؟
وربي قاعد باهت فلي مازالو يلكلكو.. ويندعيو انو الشعب معاه. يا بوڨلب... عاشو 23 سنة تحت بن علي... وعاملين فيها ما يفهموش شمعناه حكم فردي مستبد... ومسؤول وحدو على الفساد خاطر هو الحكم ... وعلاش ما يحكيش مع القوى الوسيطة في المجتمع... وما يتعاملس بشفافية مع الإعلام... والمواطن او الصحفي إلي يخدم على كشف الحائق للشعب الذي يريد معرفتها.. يتحط في ڨلبو من أجل نشر أخبار زائفة.. الخ..كيف توا. يعني مجربين... وما زالو يلكلكو مع بن علي الجديد .
واليوم...ورغم انو عمل أمرو نومرو 117.. ودستوره للحكم الفردي الإستبدادي المقاصدي... وحل المجلس الأعلى للقضاء الشرعي وعزل مسؤولين من القضاء يرفضو التوظيف... وحل هيئة الإنتخابات الشرعية ونصب مكانها هيئة موظفة... وعمل المرسوم نومرو 54.. الخ…
وزاد جوع الشعب الذي يريد...وباش ينحي الدعم.. ويبيع أملاك الشعب للحيتان الكبار الفاسدين ... كيف ما عمل قبلو بن علي... ووقتها لا شفنا تنمية ولا تشغيل من ها التفويت..بل العكس... زادت البطالة والحرقة... الخ...للي الشعب عمل ثورة من أجل الحرية والتشغيل والكرامة.. وهوما ما زالو يلكلكو... فاش يستناو بربي؟ ياخي وقت تتخذ جملة يشريو مكحلة؟ ..ياخي موش هوما وعايلاتهم واولادهم وبلادهم في الميزان.. من هذا العبث إلي عمرو ما صار؟
وياخي في عوض يمشيو للأصل... يعني الصحيح... وهو انو ها الحكم الفردي المستبد باش يزيد يبرك البلاد كل يوم يبقى فيه أكثر ... وبش يدخلها في نفق مظلم دامس عمرو ما صار منذ الإستقلال...وما زال ناده فيه على طول بمنطق معيز ولو طارو...وأكد عليه اليوم في حضور الشهداء يا بوڨلب..
موش الواجب يقتضي انهم يسحبو منو الوكالة متاع 2019... كيف ما هو يقول؟... تلقاهم مازالو مواصلين في التقشقيش.. والتلكليك.. وهوما موش شالقين انهم مساهمين بصفة غير مباشرة وبدون تفكير في العواقب.. في تعبيد الطريق لهذا النفق الدامس..
فبحيث... ولكل تلك الأسباب...وغيرها... الكلمة الوحيدة اليوم... هي ديڨاج..