توا انك وقت تكون ضد الدروس الخصوصية...من حقك.. لكن هذا راي.. ومن حقك تعبر عليه... وتقول علاش الظاهرة موجودة وكيفاش تتقلص.. وتقدم مقترحات للسلط المشرفة على التعليم ومستقبل البلاد لأنها هي المسؤولة الاولى قبل غيرها في كل البلدان وقت تتردى أوضاع التعليم... او تتحسن .. الخ ..
والناس وقتها تنجم تناقشك... وتفيدها وتفيدك.. وتكونو قدمتو حاجة للتعليم... ولبلادكم... ولو مجرد راي يمكن ينفع أصحاب القرار... وهذا طبعا كانك مختص وتفهم في الميضوع.. وموش متطفل وانتي كعبة لا.
لكن هذاكا يبقى رايك الخاص وانتي حر فيه... لأنو ثمة غيرك عندو رأي آخر... وخصوصا الأولياء إلي يقطعو في أرواحهم لحسن دراسة أبنائهم ومستقبلهم .. بدليل انتشار الظاهرة... وموش من توا بل منذ عقود..
بربي علاش يصرفو... لوكان موش هوما من اول من يعرف وضع التعليم... ووضع أبنائهم فيه وهوما إلي يراقبو فيهم.. ويعرفو قداش ثمة انقطاع عن التعليم في كل سنة وشنوا بش يكون مستقبل المنقطعين.... الخ..
فبحيث... وقت تصب بالناس لسلطة مستبدة... لأنك ضد الدروس الخصوصية راك ما عادش تعبر عن رأي... بل تقوم بفعل مغرض لقمع الناس... وماكش صاحب راي للإصلاح وكذا .. وقتها إنتي صباب يصب صبا... علنا ويبصم... وهذا خلافا للصبابة بالسرقة.
وبما انك صبيت في هاذي.. يعني أنك صباب في غيرها... وطبيعتك هي الصبة.. وبحيث أيها الأحمق.. يلي تنشر في نومرو الصبة ... راك قبل كل شيء صبيت بروحك... لأصدقائك وللناس إلي تعرفك هاذم عرفوك صباب وما عادش باش يعطيوك الجنب…
تهردت عليك... منو هكة وقت إنتي تجي... هوما يتغامزو عليك... ويبدلو الميضوع. يا والله احوال... ومن الحمق ما قتل.