و لهذا نسايسو ارواحنا و اكهو ..

حكاية الثورة

شوف سيدي ..الثورات التقليدية ..الي قريناها في الكتب و صارت في الواقع ..هاو كيفاش تصير ..يبدأ تنظيم قوي ..شد الشارع من زمان ..قائد يأمر فيطاع ..ما يكفيش هذا باش تبدأ ساعة الصفر ..يلزم يكون وصل نضج الثورة لأعماق الدولة و داخلها ..بحيث التنظيم الثوري ..القضاة متاعو حاضرين في السلك القضائي ..الضباط متاعو ..البوليسية ..الاداريين الكبار ..الملفات ..المعلومات ..مفاتح الدولة يعني ..حتى جماعة اصلاحو التربوي و الثقافي و كذا راكشين في وسط الوزارات لنهار يتحرك الشعب و يتسلم السلطة يبداو يخدمو على رواحهم ..المغنين ..المسرحيين …الخ الخ ..

بحيث في لحظة الصفر تتحرك الجماهير من برى و تتحرك الكوادر من داخل ..طف ..تتفك الدولة بيد الثورة ..معروف شكون الثورة المضادة في الدولة ..الف الفين ثلاثة ألاف ..في الاقتصاد ..في الاعلام ..يتلمدو منهم فيهم و الدولة تخدم ..طبعا تقع بعض التجاوزات ..شوية فوضى ..اكتشاف اختراقات في الثنية ..غلطة في حليف يتظلم على أنه خصم ..الخ ..لكن عالعموم الامور تمشي ..

هذا كلو ..ما ثماش في تونس ..انتفاض ..دخلت المنظومة بعضها ..خافت ..دارت على بعضها ..ندرى شنوة وقع في وسطهم ..انتصر شق ..ركح الاحزاب ..دخلت شقوق المنظومة عالخط ..اصبحت الدولة متقاسمة بينهم ..الكوادر الي ممكن تكون مع الثورة من داخل الدولة ما نجم يعرفها حد ..ركشت و سكتت و أيست من الاحزاب الكل …سيابت الساحة ..

اخترق الفاسدون الاحزاب و كونوا اخرى ..اشتروا اعلاميين ..مثقفين …اداريين ..دخل الخارج …الجماهير و الاحزاب الي دخلت للدولة ما عارفة شيء ..شكون معاها ..شكون ضدها ..دخلت بعضها ..حمص و زبيب ..ناس عملولهم ديقاج هم في الاصل كانوا يستنو في قيادة الثورة تنتدبهم باش يكونو معاها ..و ناس عينوها و إلا ثبتوها في اماكنهم هم اصلا ضد الثورة ..بحيث ..انما ..ندرى كيفاش ..

هانا توى في انتقال ديمقراطي ندرى شنوة ..مخلط حمص و زبيب لا تعرف الباهي مالخايب و باهي اليوم تفيق انو خايب غدوة و واحد تهاجمو اليوم تكتشف انك ما حقكش هاجمتو ..تدخل في عركة و تدافع على ناس تكتشف انك بوهالي الخ الخ الخ ..

برى خويا نستعملو هالدستور الي عملناه و شوية القوانين الي يمكن نعملوها و القضاء الي على قدو و شوية رقابة مجتمع مدني ..تي هو المدني هذا وضعو حمص و زبيب ..بعض احزاب ناثقو فيها ..تي حتى هي في وسطها يلزمك تفرز بين اعضائها ..تي بحيث ربي يسهل و اكهو …ثورة على غير منوال سبق …معناها هونها تعكز خير من بلاش و برى …