الوضع في تونس لم يتغير ...وهناك حكومة قادمة ...لا ندري متى لكنها قادمة خاصة بعد ان اعلنت الرئاسة عن تعيين سي الصيد مستشارا سياسيا لدى رئيس الجمهورية برتبة وزير ..وهو الذي كان رئيس حكومة وشبعوا فيه تمرميدا خاصة من طرف واحد اسمه بن تيشه الذي جعل المعارضة التونسية وصمة عار على جبين تونس . لقد اطاح بهم لأنه كان منهم .
وأبدا ما كان منهم وهذا ما لم تتفطن له المعارضة وتعاملوا معه على هذا الاساس وكان هو يتعامل مع بن علي تماما كما كان يفعل برهان بسيس…
واعتقد ان تعيين الصيد مستشارا سياسيا مثل بن تيشة يؤكد ان الشاهد رئيس الحكومة اصبح قويا ..ولا يمكن ان يتركه رئيس الدولة قويا فقرر تعيين الصيد لإضعافه لان الصيد مهما قيل فيه فهو سياسي محنك وإداري ذكي ...ولذا فهو قادر على ان يغرض من يريد في الحكومة القادمة …
وبما ان الوضع لم يتغير اذن سأعيد نشر مقال كنت نشرته سنة 2016..وقد اتبعت فيه اسلوبا هزليا واستعملت اللهجة الدارجة.
واحد من اصحابي اللي ما يحبونيش قاللي اللي سي الشاهد ما شافش حاجة مقر العزم باش يعمل حكومة شباب ...ومع ذلك سمعت اللي هو قاعد يفكر مع بعض الاحزاب لتعييني وزير الاعلام والثقافة ...باش نتفرغ للجماعة اياها....تي هاك الجماعة اللي كلاوا وشربوا على قلوبنا بعد ما كلاوا وما شبعوش من عند المقاولين متاع كمال وشفيق.....
قاللهم الشاهد ماشافشي حاجة....،، خنارهم ما يعرفوا كان محمد بن رجب....،، ولذا نحبوا يعمل فيهم شاطح باطح باش يترباوا وينحيوا الكذب والنفاق والتدجيل والأباطيل ...محمد بن رجب يعرفهم واحد واحد ..ويلزم يتفرغلهم ...وينظف منهم البلاتوهات الاذاعية والتلفزية اللي ماعادش تخرج علينا ...راهي كلها كذب..وأنا راني ما انحبهمش على خاطرهم رغم اللي جماعتهم يشكروا فيا توا فيهم اللي بدا يقول اللي انا ملايكة تمشي على الارض ونبي في السياسة ..الجماعة تحسب ...واللي يحسب وحدو معايا انا ما يفضللو حتى شيء....
اما صاحبي اللي حسدني برشة وقت اللي سمع اللي سي الشاهد قاعد يتفاوض في شاني ... سكت شوية وبوجه اصفر قاللي ...تو بالله هذه حكومة شباب وإلا شياب ياخي انت صغير هاك عمرك فوق الستين ...وزيد يظهر فيه باش ياخذ احمد نجيب الشابي وزيرا في هذي الحكومة عمرو فوق السبعين ...وزيد وزير الدفاع هو هو ...فوق الستين...و سي الوزير الاخر متاع التربية ..عمروا فوق ال
ستين يقرب من السبعين لكن وجهو متاع اطفال باش يصدقوه .......وربي يسامحني...اذا غلط في وصفو
انا ما حبيتش انقول حتى شيء ....قلت مادام الراجل فكر فيا انا ما عادش باش ننقدو....لا انقول اللي هو ولد العائلة ولا هو حفيد راضية الحداد من عايلة وسيلة بن عمار القديمة ..والشاذلية الجديدة.....ولا انقول اللي هو شاهد ما شافش حاجة.....ولا نقول اللي هو ولد سفارة امريكا بتونس مكلف بالترويج للمواد الفلاحية في تونس وافريقيا .....ولا انقول اللي هو ما كانش يحلم باش يكون حتى والي ..واذا بيه ضرب رئاسة الحكومة فرد مرة .... اعدادا له لرئاسة الدولة بعد ما ينام سي الباجي نومته الابدية الله يطول في عمرو...وهكا يعمل على غرس العائلة من جديد لخمسين سنة اخرى..فيها جماعة الباي وجماعة بورقيبة وجماعة الطرابلسية وجماعة ايتام فرنسا..وقوادة سفارة امريكا …
انا في خلاصة الامر ..ونهايته لن انقده وقد اطبل له مادام فكر فيا ..راهو موش شويا ..وزير...والله وزير وانا ما كنتش نحلم باش نوللي حتى جرد والي …
وأنا قاعد توا انلوج في التاريخ ثماشي حاجة اعتمدوها ربما لقاوا اللي انا طلعت من عائلة الباجي وما نعرفهاش الحكاية….والله يجوز على خاطر موش هكاكا بالصدفة فكروا فيا…
لازم ثمة علاقة دموية تربطني بيهم انا ما نعرفهاش…. يا ولدي. انا قلت من زمان هذا نظام دموي اكثر من نظام الدم في المملكة السعودية مع ال سعود ..وإلا الشيخ زايد في الامارات ….
ارجعوا للأسماء من عام 1956 وإذا ما تلقاوش اللي جماعة النظام يتوارثوا في الحكم موش اب عن جد بل بالمصاهرة وبالعمومة والاخوال والنسب بالدم والنسب حتى بالتبني …والخطوبات حتى..
ما تتفكروش ان اخر من خطب ابنة بن علي رصاتلو هارب مع اصهاره الى السعودية ..ولا عملت لا يدو ولا ساقو..فقط تكريما له لأنه خطب ابنة الرئيس بن علي اعطاووه شركة ستافيم متاع بيجو…موش حاجة اخرى..في انتظار ان يصبح مرشحا ليخلف صخر الماطري ..اللي كانت ليلى الطرابلسي تحضر فيه باش يخلف بن علي اللي الطرابلسية خرجوا فيه دعاية اللي هو باش يموت لانو مريض بالسرطان في البروسطاط….